Por un ensino sen ataduras

SÚMOME CONTRA A SUPRESIÓN DA GRATUIDADE DOS LIBROS DE TEXTO

A medida máis apoiada do Goberno anterior foi a implantación da gratuidade dos libros de texto nas escolas. Chega o PP… e que pasa?
Eliminan a gratuidade dos libros de texto universal. Miles de familias quedaranse sen a prestación.
Unha parella nova, que teña un fillo, cun soldo inferior ao salario mínimo interprofesional pode non ter acceso ás axudas.

SÚMOME CONTRA A POLÍTICA DE AUMENTO DO GASTO NO ENSINO PRIVADO E A DIMINUCIÓN DOS CARTOS INVESTIDOS NO ENSINO PÚBLICO

O tan cacarexado plan de aforro da Xunta de Galicia estase ceibando especialmente co ensino público, no que aplican reducións económicas cando teñen ocasión. Pola contra, os centros de ensino privado que non recibían cartos co bipartito e ligados na súa maioría ao Opus Dei, recibirán este ano preto de 3 millóns de euros.
Nas súas aulas separan a nenos e nenas.

SÚMOME Á PROTESTA CONTRA O CONFLITO LINGÜÍSTICO INVENTADO

Primeiro foi a invención en Galicia dun conflito lingüístico na campaña electoral e agora realizan unha enquisa, cuxo custo din que pode chagar aos 400.00 euros. O resultado, cociñado polos propios políticos do PP, di que a maioría dos galegos e galegas queren un ensino bilingüe.
Aínda así, o PP non descarta separar en clases de galegofalantes e castelán-falantes… acaso somos diferentes? por que non apostamos por un ensino integrador en troques dun que divida?

SÚMOME Á PROTESTA CONTRA O REAGRUPAMENTO DO ALUMNADO

Lucíronse na primeira medida da Consellería. Decidiron aforrar cartos no ensino (en lugar de incrementalos coma nos últimos catro anos) reagrupando ao alumnado en diferentes escolas, misturando nas mesmas clases a rapaces e rapazas de diferentes idades, co problema pedagóxico que isto supón.
Ademais, ducias de profesores/as perderán o seu posto de traballo.

SÚMOME Á PROTESTA CONTRA O PECHE DAS ESCOLAS

Sabías que o PP xa vai pechar 23 escolas no rural e tamén en cidades?
Acaban de chegar ó poder e xa están pechando escolas. Imaxínate cantos alumnos deberán trasladarse quilómetros e quilómetros dende a súa vila…
En Europa apostan por poucos alumnos nas escolas, aquí apostamos por pechalas.

SÚMOME Á PROTESTA CONTRA O EXPEDIENTE DE REGULACIÓN DE EMPREGO NO PROFESORADO

A Consellería demostra unha visión exclusivamente mercantilista da  educación, na que se está a facer un ERE encuberto na reagrupación de alumnado e na diminución de prazas de profesorado, algo que afectará terriblemente á calidade do sistema educativo.
Cando todo indica que a ratio debe baixar para acadar a atención individualizada, esta Consellería de Educación fai grupos máis grandes e elimina profesorado.

SÚMOME CONTRA A SUPRESIÓN DOS OBRADOIROS DE INMERSIÓN

Estes obradoiros permitían a rapaces e rapazas de entorno castelán-falantes aprender galego de forma voluntaria con obradoiros dinámicos. Era moi valorado polas familias castelán-falantes e
comunidades de inmigrantes como medida integradora, e resulta que a Xunta deixará sen fondos estas actividades. Din que son unha ‘imposición’… Dende cando as actividades voluntarias se impoñen?

SÚMOME CONTRA A POLÍTICA DE SUPRESIÓN DOS COMEDORES ESCOLARES

A día de hoxe, 2.225 nenos e nanas non teñen asegurado o comedor escolar. A nova Xunta deixou sen acordo de cátering a 17 centros públicos, e hai outros 1.700 ós que non teñan o servizo os primeiros días de clase ‘por problemas burocráticos’.
En total, 3.000 estarán sen comida asegurada. Se esta é a austeridade do PP, nós dicimos NON.

SÚMOME Á PROTESTA CONTRA A SEGREGACIÓN POR SEXO

Aínda por riba, e despois de todo isto, agora ven Feijóo e subvenciona co diñeiro de todos a escolas que segregan ós rapaces das rapazas.
Pensas que nesas escolas, na súa maioría ligadas ao Opus, aprenden o que é igualdade e a importancia da non discriminación? Este é o modelo de educación polo que aposta Feijoó?

SÚMOME PARA ESIXIR UN MAIOR FINANCIAMENTO DAS UNIVERSIDADES

Todos sabemos que Boloña é un proceso caro: máis profesorado, redución dos estudantes por clase, hai que facer clases máis pequenas etc… pero a Xunta segue sen asinar o novo acordo de financiamento que as universidade galegas levan meses pedindo. Como recibimos unha educación de calidade sen cartos?
Vai a pasar en Galicia o mesmo que na Comunidade de Madrid, onde as universidades públicas non teñen cartos para pagar os salarios do profesorado?